६ खासदारांनंतर शिंदे गटाचे दिल्लीत वजन वाढले; केंद्रीय मंत्रिमंडळात दोन मंत्रीपदांची शक्यता
नवी दिल्ली (प्रतिनिधी)
शिवसेना (उद्धव बाळासाहेब ठाकरे) पक्षातील सहा खासदारांनी एकनाथ शिंदे यांच्या नेतृत्वाखालील शिवसेनेत प्रवेश केल्यानंतर दिल्लीतील राजकीय घडामोडींना वेग आला आहे. या नव्या संख्याबळामुळे आगामी केंद्रीय मंत्रिमंडळ विस्तारात शिंदे गटाचे प्रतिनिधित्व वाढण्याची शक्यता व्यक्त केली जात आहे.
सूत्रांच्या माहितीनुसार, लवकरच होणाऱ्या केंद्रीय मंत्रिमंडळ फेरबदलात शिंदे यांच्या नेतृत्वातील शिवसेनेला एक कॅबिनेट मंत्री आणि एक राज्यमंत्री अशी एकूण दोन मंत्रीपदे मिळू शकतात. मात्र, शिंदे गटाकडून एक कॅबिनेट आणि दोन राज्यमंत्रीपदांची अपेक्षा असल्याचीही चर्चा राजकीय वर्तुळात सुरू आहे.
सध्या केंद्रात प्रतापराव जाधवांकडे जबाबदारी
सध्या केंद्र सरकारमध्ये शिंदे गटाचे प्रतिनिधित्व प्रतापराव जाधव करत असून त्यांच्याकडे स्वतंत्र प्रभारासह राज्यमंत्रीपदाची जबाबदारी आहे. आगामी मंत्रिमंडळ विस्तारात शिंदे गटाला अतिरिक्त प्रतिनिधित्व मिळते का, याकडे सर्वांचे लक्ष लागले आहे.
मंत्रीपदासाठी 'या' नेत्यांची नावे चर्चेत
केंद्रीय मंत्रिमंडळ विस्ताराच्या पार्श्वभूमीवर शिंदे गटातील काही प्रमुख नेत्यांची नावे चर्चेत आहेत. त्यामध्ये, प्रामुख्याने डॉ. श्रीकांत शिंदे, प्रतापराव जाधव, संजय जाधव, ओमराजे निंबाळकर आणि श्रीरंग बारणे या नेत्यांचा संभाव्य दावेदारांमध्ये समावेश असल्याची चर्चा आहे.
प्रादेशिक आणि राजकीय समीकरणांवर अंतिम निर्णय
महाराष्ट्रातील प्रादेशिक समतोल, लोकसभा सदस्यसंख्या आणि राष्ट्रीय लोकशाही आघाडी (NDA)तील राजकीय समीकरणांचा विचार करून अंतिम निर्णय घेतला जाण्याची शक्यता आहे. त्यामुळे आगामी मंत्रिमंडळ विस्तारात शिंदे गटाला नेमके किती मंत्रीपदे मिळतात आणि कोणत्या नेत्यांना संधी मिळते, याकडे राज्याच्या राजकारणाचे लक्ष लागले आहे.
