तू होतास की भास... कवयित्री मनिषा भिसे

अलिबाग शहरात मतदान जनजागृतीची लाट; शालेय विद्यार्थ्यांचा अनोखा उपक्रम:2 डिसेंबरला शंभर टक्के मतदानाचे आवाहन; अलिबागमध्ये सजली जनजागृती

रायगड - अमुलकुमार जैन 

अलिबाग नगरपरिषद सार्वत्रिक निवडणूक 2025 पार्श्वभूमीवर शहरात मतदान जनजागृतीला मोठी गती मिळाली आहे. शालेय विद्यार्थ्यांनी सादर केलेल्या प्रभावी पथनाट्याने संपूर्ण अलिबाग शहरात मतदानाबाबत जागृतीची लाट निर्माण केली. अलिबाग एसटी बस आगारासह शहरातील विविध ठिकाणी हे पथनाट्य सादर करण्यात आले.

विद्यार्थ्यांनी “मतदार राजा जागा हो”, “लोकशाहीचा धागा हो”, “वोट हमारा है अनमोल”, “कुठल्याही अमिषाला बळी पडू नका” यांसारखे संदेश देत नागरिकांना मतदानाचे महत्त्व पटवून दिले. नागरिकांनी या पथनाट्याचे व्हिडिओ व फोटो काढत उत्स्फूर्त प्रतिसाद दिला. तरुण कलाकारांनी आपल्या कौशल्यातून लोकशाहीतील प्रत्येक मताचे मूल्य अधोरेखित केले.

या उपक्रमाबरोबरच अलिबाग नगरपरिषद प्रशासनानेही शहरभर व्यापक जनजागृती मोहीम राबवली. स्पीकरद्वारे सतत अनाउन्समेंट, रांगोळ्या, बॅनर, पोस्टर, तसेच प्रत्यक्ष संपर्क मोहिमेद्वारे नागरिकांना 2 डिसेंबरला मतदान करण्याचे आवाहन करण्यात आले. या जनजागृती कार्यक्रमात नगरपालिका अधिकारी, कर्मचारी आणि शिक्षक मोठ्या संख्येने सहभागी झाले होते.

अधिकाधिक नागरिकांनी मतदान करून सक्षम लोकप्रतिनिधी निवडावेत, यासाठी नगरपरिषद प्रशासनाने विशेष प्रयत्न केले आहेत. “सक्षम लोकशाहीसाठी प्रत्येकाने जबाबदारीने मतदान करणे अत्यावश्यक आहे,” असा संदेश देत प्रशासनाने अलिबागकरांना 2 डिसेंबर 2025 रोजी शंभर टक्के मतदान करण्याचे आवाहन केले आहे.

अलिबाग शहरातील विद्यार्थ्यांच्या या अनोख्या उपक्रमामुळे निवडणुकीबाबत सकारात्मक वातावरण निर्माण झाले असून नागरिकांमध्ये लोकशाहीप्रती जागरूकता वाढताना दिसत आहे.