झोपेतून उठताना आली चक्कर; आईला हाक मारली अन्..पुण्यात २८ वर्षीय तरुणाचा आकस्मिक मृत्यू
पुणे(वार्ताहर)
पुण्यातील भोर तालुक्यातून एक धक्कादायक घटना समोर आली आहे. राहत्या घरात झोपेतून उठला आणि आईला हाक मारताना अचानक चक्कर येऊन एका 28 वर्षीय तरुणाचा मृत्यू झाला आहे. अचानक ही घटना घडल्याने एकच खळबळ उडाली आहे. अक्षय देविदास रिंगे (वय-२९) असे मृत्यू झालेल्या तरुणाचे नाव असून रविवारी दुपारी ही घटना घडली आहे. या प्रकरणी पोलिसांनी आकस्मित मृत्यूची नोंद केली आहे. त्याचा मृत्यू हृदयाविकाराने झाला असावा अशी शक्यता व्यक्त केली जातं आहे.
रविवारी सकाळी नदीत तो पोहण्यास गेला होता. थोडा नाश्ता केल्यानंतर अक्षयला अस्वस्थ वाटू लागले. त्यामुळे तो थोडावेळ झोपला. दुपारी झोपेतून उठताना त्याला अचानक चक्कर आली. त्यावेळेस त्याने आईला हाक मारली आणि खाली कोसळला. घरातील व्यक्तींनी त्याला तातडीने रुग्णलायत दाखल केले. मात्र, डॉक्टरांनी त्याला मृत घोषित केले. भोरमधील राजगड पोलीस स्टेशनमध्ये आकस्मिक मृत्यू म्हणून करण्यात आली आहे. अक्षयचा मृत्यू कशाने झाला हे कळले नाही मात्र हृदयाविकाराने हा मृत्यू झाल्याची शक्यता व्यक्त केली जात आहे. शवविच्छेदनाचा अहवाल आल्यानंतर नेमके मृत्यूचे कारण समजू शकते.
अक्षय हा सामाजिक कार्यात सक्रिय सहभागी होता. खेळाची आवड असलेला आणि सर्वांशी मैत्रीपूर्ण संबंध ठेवणारा हा युवक अचानक काळाच्या पडद्याआड गेल्याने गावकऱ्यांनी हळहळ व्यक्त केली आहे. सुस्वभावी अक्षयचा मित्रवर्गही मोठा होता. त्यांनाही या वृत्ताने धक्का बसला आहे. त्याच्या अकाली निधनाने कुटुंबीयांसह मित्र आणि संपूर्ण गावावर शोककळा पसरली आहे. गावातील होतकरु तरुण गमावल्याची प्रतिक्रिया ग्रामस्थांनी व्यक्त केली आहे. गावातील नागरिकांकडून त्याच्या आठवणींना उजाळा देत हळहळ व्यक्त केली जात आहे. अक्षयच्या मृत्यूमुळे नसरापूर गावातील सामाजिक आणि सांस्कृतिक क्षेत्रात मोठी पोकळी निर्माण झाली आहे. अंत्यविधीच्यावेळी मोठ्या संख्येने परिसरातील नागरिक उपस्थित होते. अक्षयच्या पश्चात आई, भाऊ, बहीण असा परिवार आहे. या प्रकरणी पोलिसांनी आकस्मात मृत्यूची नोंद केली आहे.
