एसटीच्या साध्या बसचे 10% वाढीव भाडे 31 जुलैपर्यंत कायम; प्रवाशांना दिलासा नाही
मुंबई (प्रतिनिधी)
महाराष्ट्र राज्य मार्ग परिवहन महामंडळाने (MSRTC) साध्या एसटी बससेवेसाठी लागू असलेली 10 टक्के परिवर्तनशील (हंगामी) भाडेवाढ आणखी 31 जुलै 2026 पर्यंत कायम ठेवण्याचा निर्णय घेतला आहे. डिझेलच्या वाढत्या किमती, इंधनावरील वाढलेला खर्च आणि प्रवासी सेवेचा आर्थिक भार लक्षात घेऊन हा निर्णय घेण्यात आला आहे. त्यामुळे सध्या तरी एसटी प्रवाशांना भाडेवाढीत कोणताही दिलासा मिळणार नसून वाढीव दरानेच प्रवास करावा लागणार आहे.
यापूर्वी उन्हाळी सुट्यांतील वाढती प्रवासी गर्दी लक्षात घेऊन साध्या बससेवेसाठी 10 टक्के तात्पुरती भाडेवाढ लागू करण्यात आली होती. या निर्णयाची मुदत 15 जुलै 2026 रोजी रात्री 12 वाजता संपली आहे. मात्र, वाढती प्रवासी संख्या, सध्याची वाहतूक गरज आणि डिझेल दरातील सातत्याने होत असलेली वाढ यांचा विचार करून महामंडळाने या भाडेवाढीस आता आणखी मुदतवाढ दिली आहे.
महामंडळाने दिलेल्या माहितीनुसार, एसटी ही ग्रामीण महाराष्ट्राची जीवनवाहिनी असून दररोज लाखो प्रवासी या सेवेद्वारे प्रवास करतात. परवडणारी, सुरक्षित आणि विश्वासार्ह सेवा देण्यासाठी महामंडळ सातत्याने प्रयत्नशील आहे. मात्र, गेल्या काही महिन्यांत डिझेलच्या वाढलेल्या किमतीमुळे महामंडळाच्या दैनंदिन इंधन खर्चात मोठी वाढ झाली आहे. त्याचा थेट परिणाम महामंडळाच्या आर्थिक स्थितीवर होत असल्याने परिवर्तनशील भाडेवाढ कायम ठेवण्याचा निर्णय घेण्यात आला आहे. या निर्णयानुसार 31 जुलै 2026 रोजी रात्री 12 वाजेपर्यंत साध्या एसटी बससेवेसाठी 10 टक्के वाढीव भाडे लागू राहणार आहे. पुढील निर्णय परिस्थितीचा आढावा घेऊन जाहीर केला जाईल.
महामंडळाने स्पष्ट केले आहे की, प्रवाशांना सुरक्षित, नियमित आणि दर्जेदार सेवा उपलब्ध करून देणे हेच त्यांचे प्रमुख उद्दिष्ट आहे. वाढत्या इंधन खर्चाचा आर्थिक ताण काही प्रमाणात कमी करण्यासाठी ही भाडेवाढ आवश्यक असल्याचे सांगत, प्रवाशांनी या निर्णयाला सहकार्य करावे, असे आवाहनही महाराष्ट्र राज्य मार्ग परिवहन महामंडळाच्या वतीने करण्यात आले आहे.
