खोपोली नगर परिषद : कुलदीपक शेंडे यांचा नगराध्यक्षपदाचा शपथविधी साधेपणात पार
खोपोली | प्रतिनिधी
खोपोली नगर परिषदेच्या नगराध्यक्षपदाचा पदभार कुलदीपक शेंडे यांनी आज अधिकृतरित्या स्वीकारला. सामाजिक कार्यकर्ते मंगेश काळोखे यांच्या नुकत्याच झालेल्या दुर्दैवी हत्येच्या पार्श्वभूमीवर हा पदग्रहण सोहळा अत्यंत साधेपणाने पार पडला. यावेळी मुख्याधिकारी पंकज पाटील यांच्या हस्ते कुलदीपक शेंडे यांचा पुष्पगुच्छ व शाल देऊन सत्कार करण्यात आला.
या कार्यक्रमाला रिपब्लिकन पक्षाचे जिल्हाध्यक्ष नरेंद्र गायकवाड, भाजप नेते दीपक बेहरे, शिवसेना नेते विजय पाटील व प्रसाद थोरवे यांच्यासह अनेक मान्यवर उपस्थित होते. माजी उपनगराध्यक्ष मोहन ओसरमल हेदेखील यावेळी व्यासपीठावर उपस्थित होते. उपस्थित मान्यवरांनी नवनिर्वाचित नगराध्यक्षांना शुभेच्छा दिल्या.
यावेळी सर्व नवनिर्वाचित नगरसेवकांचा नगराध्यक्ष कुलदीपक शेंडे व मुख्याधिकारी पंकज पाटील यांच्या हस्ते सत्कार करण्यात आला.
आपल्या भाषणात नगराध्यक्ष शेंडे यांनी मंगेश काळोखे यांच्या दुःखद हत्येमुळे हा सोहळा साधेपणाने साजरा करण्याचा निर्णय घेतल्याचे स्पष्ट केले. आमदार महेंद्र थोरवे तसेच शिवसेना पक्षाने दाखविलेल्या विश्वासाबद्दल त्यांनी कृतज्ञता व्यक्त केली. शहराच्या विकासासाठी राजकीय मतभेद बाजूला ठेवून सर्वपक्षीय नगरसेवकांनी एकत्र काम करावे, असे आवाहन करत “राजकीय चपला बाहेर ठेवून शहराच्या विकासासाठी एकत्र काम करूया,” असा स्पष्ट संदेश त्यांनी दिला. प्रशासनाकडून आवश्यक सहकार्य मिळेल, असा विश्वासही त्यांनी व्यक्त केला.
आगामी काळातील प्राधान्यक्रम सांगताना शहरातील दवाखाने सर्व सोयींनी युक्त करणे, शिवजयंतीपर्यंत नाट्यगृह उपलब्ध करून देणे तसेच नवीन सार्वजनिक स्वच्छतागृहे उभारण्याच्या कामांना गती देण्याचा निर्धार त्यांनी व्यक्त केला. पुढील पाच वर्षांत विकासकामांसाठी कटिबद्ध राहण्याचा संकल्प यावेळी जाहीर करण्यात आला.
कार्यक्रमाच्या प्रारंभी मंगेश काळोखे यांना श्रद्धांजली वाहण्यात आली. उपमुख्यमंत्री एकनाथ शिंदे यांच्या तातडीच्या बैठकीसाठी आमदार महेंद्र थोरवे मुंबईस गेल्याने ते कार्यक्रमास उपस्थित राहू शकले नाहीत. मात्र सर्वपक्षीय नगरसेवक, नगरसेविका, कार्यकर्ते व नागरिक मोठ्या संख्येने उपस्थित राहून नूतन नगराध्यक्ष व नगरसेवकांना शुभेच्छा दिल्या.
