२४ वर्षांच्या पळापळीनंतर शेवटी शिताफीने कोंडीत पकडला—गर्भवती भावजयीच्या खुनातील फरार आरोपीला नेरळ पोलिसांची गाठ
रायगड - अमुलकुमार जैन
तब्बल २४ वर्षे कायद्याच्या हातातून सुटत पळणाऱ्या संतोष गणपत राणे या फरार आरोपीला अखेर रायगड जिल्हा पोलीस दलाच्या नेरळ पोलीस ठाणे पथकाने अटक करण्यास यश मिळवले आहे. ९ महिन्यांची गर्भवती असलेल्या भावजयीचा निर्घृण खून करून आरोपी २००१ पासून फरार होता. या गुन्ह्यामुळे पोही गाव परिसरात मोठी खळबळ उडाली होती.
०२ फेब्रुवारी २००१ रोजी आरोपी संतोष राणे हा किरकोळ कारणावरून भाऊ व भावजयीशी वाद घालत होता. रागाच्या भरात घरातून कुऱ्हाड आणून त्याने गुलाब राणे हिच्यावर मानेवर व हातावर अनेक वार केले. गर्भवती अवस्थेतच तिचा जागीच मृत्यू झाला. गुन्हा केल्यानंतर आरोपी गावातून पसार झाला आणि वर्षानुवर्षे नाव, ओळख व वास्तव्य बदलत राहून पोलिसांना चकवत राहिला.
मा. पोलीस अधीक्षक श्रीमती आँचल दलाल, अप्पर पोलीस अधीक्षक अभिजीत शिवथरे व उपविभागीय पोलीस अधिकारी राहुल गायकवाड यांच्या मार्गदर्शनाखाली नेरळ पोलीस ठाण्याने आरोपीचा शोध अधिक वेगाने सुरू केला. तांत्रिक तपास, जुन्या धागेदोरे, नातेवाईकांची चौकशी आणि सततच्या गुप्त माहिती संकलनातून आरोपी पिंपरी-चिंचवडमधील सांगवी परिसरात ‘संतोष गणपत पाटील’ या बनावट नावाने राहत असल्याची खात्री पटली.
सहा. पोलीस निरीक्षक शिवाजी ढवळे यांच्या नेतृत्वाखालील विशेष पथक—पीएसआय भास्कर गंगाधर गच्चे, पोशि राजाभाऊ केकाण आणि पोशि आश्रुबा बेद्रे—यांनी संयम, शिताफी आणि नियोजनपूर्वक केलेल्या कारवाईत आरोपीला ताब्यात घेतले. त्या वेळी तो केटरिंगचा व्यवसाय करीत असल्याचे समोर आले. प्राथमिक चौकशीत त्याने गुन्ह्याची कबुलीही दिली.
आरोपीला नेरळ पोलीस ठाण्यात आणून कायदेशीर अटक करण्यात आली असून पुढील तपास पोलीस उपनिरीक्षक नितीन मंडलीक करीत आहेत. दोन दशकांहून अधिक काळ न्यायापासून दूर पळणाऱ्या आरोपीला अखेर पकडण्यात आलेली ही कारवाई रायगड पोलिसांची उल्लेखनीय कामगिरी ठरली आहे.
