तू होतास की भास... कवयित्री मनिषा भिसे

 उमेदवारीपेक्षा गुन्ह्यांची संख्या जास्त? महाडमधील धक्कादायक वास्तव

रायगड - अमुलकुमार जैन 

महाड नगरपरिषद निवडणूक २०२५ च्या तोंडावर उमेदवारीपेक्षा गुन्ह्यांची संख्या जास्त असल्याचे धक्कादायक वास्तव समोर आले आहे. विविध पक्षांच्या नगराध्यक्ष आणि नगरसेवकपदाच्या उमेदवारांनी नामनिर्देशन पत्रात स्वतःच जाहीर केलेल्या माहितीनुसार, एकूण नऊ उमेदवारांवर तब्बल चौदा गुन्हे प्रलंबित आहेत. यात विशेष म्हणजे दोन महिला उमेदवारांचाही समावेश असून अनेक प्रकरणे दोन वर्षांपेक्षा अधिक शिक्षेची तरतूद असलेल्या गंभीर श्रेणीत मोडतात.

महाडमध्ये आधीच काही उमेदवारांच्या शैक्षणिक पात्रतेवर प्रश्नचिन्ह निर्माण झाले होते. त्यातच आता गुन्हेगारी पार्श्वभूमीची माहिती समोर आल्याने नागरिकांमध्ये नाराजीची लाट पसरली आहे. 307 (खून करण्याचा प्रयत्न), 354 (महिलांवरील अपराध), 420 (फसवणूक), 467-468 (बनावट कागदपत्रे), 506 (धमकी), 188, 143, 147, 323, 351, 353 अशा गंभीर कलमांनी भारलेली उमेदवारांची यादी मतदानापूर्वी मोठा प्रश्न निर्माण करत आहे.

उमेदवारांनीच दाखल केलेल्या प्रतिज्ञापत्रानुसार काही जणांवर एक नाही तर दोन ते चार गुन्हे प्रलंबित आहेत. यामुळे, अशा उमेदवारांना शहराची जबाबदारी देणे योग्य ठरेल का? असा मोठा आणि नैतिक प्रश्न नागरिकांसमोर उभा राहिला आहे. कायद्याने गुन्ह्यांची माहिती जाहीर करणे बंधनकारक असले तरी, ही माहिती समोर आल्यानंतर मतदारातील अविश्वास अधिकच वाढताना दिसत आहे.

काही नागरिकांचे म्हणणे आहे की राजकीय दबाव, पक्षीय वैमनस्य किंवा आंदोलनांदरम्यान झालेले प्रकरणे हे काही गुन्हे असू शकतात. मात्र अनेक गंभीर कलमांमुळे धर्मादाय संस्था, व्यावसायिक मंडळे आणि नागरिक संघटनांनी चिंता व्यक्त केली आहे. महाडसारख्या वाढत्या शहराचे नेतृत्व जबाबदार व स्वच्छ प्रतिमेच्या नेतृत्वाकडे असावे, अशी मागणी पुढे येत आहे.

उमेदवारांना मतदार नाकारणार का? की स्थानिक राजकीय निष्ठेमुळे पुन्हा हेच चेहरे विजयी ठरणार? हे मतदानानंतरच स्पष्ट होईल. परंतु सध्या मात्र महाडची निवडणूक गुन्हेगारी पार्श्वभूमीच्या चर्चेने सर्वाधिक गाजत आहे, हे निश्चित.