तू होतास की भास... कवयित्री मनिषा भिसे

 मेटगुताड येथे भारतीय संविधान दिन विविध उपक्रमांनी उत्साहात साजरा...

मेटगुताड(वार्ताहर)

       जिल्हा परिषद केंद्रशाळा मेटगुताड येथे शाळेतील विद्यार्थ्यांनी विविध उपक्रमांनी संविधान दिन अत्यंत उत्साह पूर्ण वातावरणात साजरा केला. यामध्ये प्रामुख्याने लेझीम पथक युक्त प्रभात फेरीचे आयोजन करण्यात आले. डॉ. बाबासाहेब आंबेडकर यांची वेशभूषा परिधान केलेल्या इयत्ता तिसरीतील शिवम बावळेकर याने हातात संविधान पुस्तिका घेऊन प्रभात फेरीचे नेतृत्व केले. "एक राष्ट्र एक उद्देशिका" या उपक्रमांतर्गत भारतीय संविधानाच्या प्रास्ताविकेचे ग्रामस्थांच्या समवेत प्रकटपणे अनुवाचन करण्यात आले. प्रभात फेरी सुरू असताना विद्यार्थ्यांनी संविधान दिनानिमित्त विविध घोषवाक्यांचा जयघोष केला. सदर दिवशी संविधान दिनाचे औचित्य साधून शाळेत शिकणाऱ्या विद्यार्थ्यांच्या पालकांची शैक्षणिक पालक सभा आयोजन करण्यात आली. शाळेच्या भौतिक सुविधा, विद्यार्थी गुणवत्ता, शालेय गुणवत्ता, लोकसहभाग, विद्यार्थ्यांनी विविध स्पर्धेत मिळवलेले यश आणि शाळेच्या विकासात्मक बाबींवर सविस्तर चर्चा करण्यात आली. यासाठी मेटगुताड गावातील ग्रामीण कलाकार, महिला बचतगट, ग्रामीण युवा आणि स्थानिक समुदाय यांचा सक्रिय सहभाग लाभला. शाळेतील विद्यार्थ्यांकडून भारतीय संविधानाच्या उद्देशिकेचे सुंदर हस्ताक्षरात लेखन करून घेण्यात आले. याप्रसंगी मेटगुताड गावचे प्रथम नागरिक तथा सरपंच भिकन बावळेकर, महादेव ओंबळे, ग्रामपंचायत अधिकारी वैभव काळे, शाळा व्यवस्थापन समिती अध्यक्ष अनिल बावळेकर, सदस्या पूनम बावळेकर, शाळेचे उपशिक्षक श्रीगणेश शेंडे, रवींद्र भिलारे, वैशाली गुरव, प्रियांका बावळेकर, शीतल बावळेकर आणि ग्रामस्थ उपस्थित होते.