तू होतास की भास... कवयित्री मनिषा भिसे

 अलिबागमध्ये राजकीय रंगत वाढली; आघाडीने युतीला दिला पहिला झटका. 

रायगड - अमुलकुमार जैन 

अलिबाग नगरपरिषदेच्या प्रभाग क्रमांक 2 ब मधील निवडणुकीत शेकाप आणि काँग्रेस आघाडीने युतीला पहिला धक्का दिला असून, शेकापचे उमेदवार प्रशांत नाईक बिनविरोध निवडून आले आहेत. गुरुवारी (दि. 20) भाजपचे उमेदवार संतोष साळुंखे यांनी आपले नामनिर्देशन पत्र मागे घेतल्यामुळे प्रशांत नाईक यांना प्रभागातील नगरसेवक पदासाठी बिनविरोध विजय मिळाला.

बिनविरोध निवडून आल्यानंतर शेकाप आघाडीचे पदाधिकारी आणि कार्यकर्ते शेतकरी भवन येथे जमा झाले आणि प्रशांत नाईक यांचे अभिवादन करून जल्लोष साजरा केला. यावेळी आघाडीच्या नगराध्यक्ष पदाच्या उमेदवार अक्षया नाईक, नगरसेवक पदाच्या उमेदवार अॅड. मानसी म्हात्रे तसेच इतर उमेदवार उपस्थित होते. या विजयामुळे आघाडीला नगरपरिषदेतील मजबूत पकड मिळण्याची शक्यता वाढली आहे.

अलिबाग नगरपरिषद निवडणुकीसाठी मतदान प्रक्रिया 2 डिसेंबर रोजी पार पडणार आहे. एकूण प्रभागांमध्ये शेकाप- काँग्रेस आघाडी आणि भाजप-शिवसेना (शिंदे गट) युती यांच्यात जोरदार लढत होणार आहे. प्रभाग क्रमांक 2 ब मधील बिनविरोध विजयाने आघाडीला सुरुवातीपासूनच मानसिक बळ मिळाले आहे. 21 नोव्हेंबरपर्यंत उमेदवार आपले नामनिर्देशन पत्र मागे घेऊ शकतात, त्यामुळे अंतिम यादीनंतरच संपूर्ण निवडणुकीचे समीकरण स्पष्ट होईल.

शेकाप आघाडीने प्रभाग 2 ब मध्ये बिनविरोध विजय मिळवल्याने नगरपरिषदेतील सत्ता स्थिर करण्यासाठी आघाडीच्या रणनीतीला बळकटी मिळाली आहे. शहरातील राजकीय वातावरण आता अधिक उत्सुकतेने पाहिले जात असून, मतदानपूर्वीच्या रणनीती आणि प्रभागातील मतदारांची पसंती निवडणुकीच्या निकालावर ठराविक परिणाम करणार असल्याचे विश्लेषकांचे मत आहे.

या घटनाक्रमामुळे अलिबागमध्ये राजकीय रंगत आणि उत्सुकता वाढली असून, नगरपरिषदेतील पुढील सत्ता समीकरण कोणाकडे झुकणार याकडे सर्वांचे लक्ष लागले आहे.