अलिबाग नगरपालिकेकडे पुन्हा जनतेचे लक्ष“2016 ची परंपरा, 2025 चे नवे नेतृत्व – स्मार्ट सिटी अलिबागसाठी तरुणाईचा चेहरा ‘अक्षया नाईक’ मैदानात!”
रायगड - अमुलकुमार जैन
अलिबाग शहर नऊ वर्षांनंतर पुन्हा एकदा महत्त्वाच्या निवडणुकीच्या उंबरठ्यावर उभे आहे. 2016 मध्ये शेतकरी कामगार पक्षाने 17 नगरसेवकांसह नगराध्यक्ष पदावर ऐतिहासिक विजय मिळवून शहरातील विकासाची नवी वाट उघडली होती. नगराध्यक्ष प्रशांत नाईक यांच्या नेतृत्वाखाली शहरात स्वच्छता, सुरक्षितता, पायाभूत सुविधा आणि प्रशासनातील पारदर्शकता यावर विशेष भर देण्यात आला, असे माजी उपनगराध्यक्षा तथा नगरसेविका पदाच्या उमेदवार ॲड. मानसी म्हात्रे यांनी सांगितले.
मानसी म्हात्रे म्हणाल्या की, “आजही अलिबागकर शेतकरी कामगार पक्षावर निस्सीम विश्वास ठेवतात. सर्वपक्षीय विचारसरणीच्या तरुणांना आकर्षित करणारा हा एकमेव पक्ष आहे.” वाढत्या तरुण मतदारसंख्येच्या पार्श्वभूमीवर पक्षाने तरुण नेतृत्वावर विश्वास ठेवत स्व. नमिता नाईक आणि प्रशांत नाईक यांची कन्या ‘अक्षया नाईक’ यांना उमेदवारी दिली आहे.
पक्षाच्या नेतृत्वाचे मत स्पष्ट आहे – “अक्षया ही आमच्या पक्षाची उमेदवार नाही तर शहराच्या नव्या पिढीची प्रतिनिधी आहे. तिच्या नावावर नागरिकांचा विश्वास आजही दृढ आहे.”
शहराच्या पर्यटन विकासासाठी प्रशांत नाईक आणि त्यांच्या टीमने अनेक प्रकल्प यशस्वीरित्या राबवले — समुद्रकिनाऱ्याचे सुशोभीकरण, युद्धातील ऐतिहासिक टँकचे आकर्षण, नमिता नाईक स्पोर्ट्स कॉम्प्लेक्स, भुयारी गटार प्रकल्प, आधुनिक भाजी व मच्छी मार्केट, कचरा प्रक्रिया प्रकल्प आदी उपक्रमांनी अलिबागच्या विकासाला गती मिळाली आहे.
“स्मार्ट सिटी अलिबाग” हे पुढील पाच वर्षांचे स्वप्नवत व्हिजन पक्षाने जाहीर केले असून पर्यटन, इतिहास, आधुनिक सुविधा आणि स्वच्छतेचा संगम साधत अलिबागला जागतिक दर्जाचे शहर बनवण्याचा संकल्प आहे.
“अलिबागमध्ये ठोस विरोधक नाहीत; पक्षाशी असलेले भावनिक नातेच आमची मोठी ताकद आहे,” असे स्थानिक नेत्यांनी स्पष्ट केले.
अलिबागच्या प्रगतीचा नवा अध्याय लिहिण्यासाठी अक्षया नाईक ही तरुणाईची नवी आशा ठरत असून, 2025 ची निवडणूक शहराच्या भवितव्यासाठी निर्णायक ठरणार असल्याचे ॲड. मानसी म्हात्रे यांनी सांगितले.
