आदर्श पतसंस्थेचा आता स्वतंत्र गोल्ड विभाग , कमी व्याजदराने दराने गोल्ड लोन उपलब्ध होणार...
अलिबाग (प्रतिनिधी)
रायगड जिल्ह्यात प्रथम क्रमांकावर झेप घेणारी अलिबाग येथील आदर्श नागरी सहकारी पतसंस्थेने ग्राहकांच्या सेवेसाठी आपला स्वतंत्र आदर्श गोल्ड विभाग सुरू केला आहे. टेलिफोन एक्सचेंज कार्यालया जवळ, नागडोंगरी , अलिबाग येथे हा विभाग सुरू करण्यात आला आहे.
आदर्श नागरी सहकारी पतसंस्था आपल्या ग्राहकांसाठी विविध सेवा देत असते. आदर्शच्या शाखांमधून सोने तारण कर्ज दिले जाते. परंतु आता स्वतंत्र गोल्ड विभाग सुरू करण्यात आला आहे. या विभागातून केवळ सोनेतारण कर्जच देण्यात येणार आहे. स्वतंत्र गोल्ड विभाग सुरू करणारी आदर्श पतंस्था ही रायगड जिल्ह्यातील पहिली पतसंस्था आहे. येथे सावकारी नाही तर सहकारी दराने गोल्ड लोन उपलब्ध होणार आहे.
रायगड जिल्हा सहकारी संस्था उपनिबंधक मा. प्रमोद जगताप सर यांच्या शुभ हस्ते सोमवार दिनांक 27 ऑक्टोबर रोजी आदर्श गोल्ड विभागाचे उद्घाटन करण्यात आले. आदर्श नागरी सहकारी पतसंस्थेचे संस्थापक सुरेश पाटील, अध्यक्ष अभिजीत पाटील, संचालक सतिश प्रधान, महेश चव्हाण, श्रीकांत ओसवाल, अ‍ॅड. रेश्मा पाटील, अ‍ॅड. वर्षा शेठ, विलाप सरतांडेल, सल्लागार व मार्गदर्शक श्री . नितीन वाणी , मुख्य कार्यकारी अधिकारी सौ. मीनाक्षी पाटील आदी मान्यवर यावेळी उपस्थित होते.
आदर्श नागरी सहकारी पतसंस्था आपल्या ग्राहकांसाठी चांगल्या सुविधा देत असते. या पतसंस्थेने स्वतंत्र गोल्ड विभाग सुरू करून नवीन आदर्श निर्माण केला आहे, असे रायगड जिल्हा सहकारी संस्था उपनिबंधक प्रमोद जगताप सर म्हणाले.
खासगी वित्तीय कंपन्या आणि एनबीएफसी 1 ते 33 दिवसांसाठी 24.75 टक्के प्रति वर्ष, 34 ते 60 दिवसांसाठी 26 टक्के प्रति वर्ष, 61 ते 365 दिवसांसाठी 26 टक्के प्रति वर्ष व देय तारखेनंतर कर्ज परतफेड केल्यास 2 टक्के वार्षिक दंड व्याज अशा पद्धतीने ग्राहकांना कमी व्याजाच्या नावाखाली जास्त दराने व्याज आकारले जाते. लपविलेले प्रोसेसिंग फी, दंड व्याज आणि गैरपारदर्शक अटींमुळे अनेक ग्राहकांना आर्थिक तोटा सहन करावा लागतो. आदर्श पतसंस्था मात्र पारदर्शक अटी आणि सहकारी भावनेने काम करते. आमच्याकडे गोल्ड लोनवर स्थिर आणि न्याय्य दर आकारले जातात. कोणतेही लपविलेले शुल्क नाही, कोणतीही दिशाभूल नाही. आमच्या गोल्ड विभागातून सोने तारण कर्ज देताना सुरूवातीला जो व्याजदर असेल तोच शेवटपर्यन्त राहणार आहे. व्याजदारात वाढ होणार नाही. सावकारी नाही तर सहकारी व्याजदरानेच गोल्ड लोन दिले जाणार आहे, असे आदर्श नागरी सहकारी पतसंस्थेचे संस्थापक सुरेश पाटील यांनी सांगितले.
