कोजागिरी
सागर मंथने । लक्ष्मी प्रगटन ।
पौर्णिमेचा दिन । अश्विनाचा ।।१।।
पौराणिक कथा । सुरस ती सारी ।
या दिनी भूवरी । लक्ष्मीवास ।।२।।
कोण तो सजग । कोण ज्ञानातूर ।
पाहण्या संचार । लक्ष्मी करी ।।३।।
सकलांना पुसे । ती कोजागरती ।
म्हणुनी म्हणती । कोजागिरी ।।४।।
लक्ष्मी उपासना । होई या दिनाला ।
पुजती चंद्राला । लक्ष्मीसवे ।।५।।
पूजेची सांगता । दूध नैवैद्याने ।
चांद्रकिरणाने । युक्त ऐसा ।।६।।
शरद पौर्णिमा । म्हणतात काही ।
ऋतूत ती येई । म्हणूनची ।।७।।
या दिनी चंद्रमा । सर्वात जवळ ।
शास्त्र ते खगोल । सांगतसे ।।८।।
निसर्गाबद्दल । कृतज्ञतेस्तव ।
नवान्न पुनव । वदतात ।।९।।
या दिनी करती । नवान्न पक्वान्न ।
नवीचे तोरण । मुख्यद्वारी ।।१०।।
खानपान सेवा । मैफिली झकास ।
उदंड उल्हास । प्रत्येकात ।।११।।
पुराणे विज्ञाने । ख्याती असे तिची ।
प्रिय ती सर्वांची । कोजागिरी ।।१२।।
श्री. प्रविण शांताराम म्हात्रे .
