सावली
मायेची सावली । भासते शीतल |
प्रेमळ कोमल । माय माझी ॥१॥
ममत्त्वाची मूर्ती । आई शब्द थोर ।
मिटवितो घोर । जीवनाचा ॥२॥
अनमोल देणं । संस्कारांचा ठेवा ।
सुखी ठेव देवा । माऊलीस ॥३॥
जीवनाचे धडे । गिरवून घेते ।
पूर्णत्वास नेते । संकल्पास ॥४॥
कौतुक करूनी । पाठीवर थाप ।
वात्सल्य अमाप। देई बाळां ॥५ ॥
घरात नांदते । तिच्या पायी लक्ष्मी
समाधान हमी । सान्निध्यात ॥६ ॥
शरयु मानते। जगी महान्माता ।
कुटुंब विधाता । असे आई ॥७॥
सौ.शरयु पाम्पट्टीवार.
दिग्रस, यवतमाळ.
