खेळ, स्वच्छता, सुरक्षा आणि स्मार्ट सुविधांचा अजेंडा—अक्षया नाईक यांची व्यापक भविष्यदृष्टी”
रायगड - अमुलकुमार जैन
अलिबाग नगरपरिषदेच्या निवडणुकीत शेकाप–काँग्रेस आघाडीच्या नगराध्यक्ष पदाच्या उमेदवार अक्षया प्रशांत नाईक यांनी शहराच्या सर्वांगीण विकासासाठी प्रभावी आणि समन्वित असा व्यापक अजेंडा मांडला आहे. खेळ, स्वच्छता, सुरक्षा आणि स्मार्ट सुविधांचा समतोल साधत अलिबागला आधुनिक, सुरक्षित आणि तरुणाईच्या ऊर्जा वाहणारे शहर बनवण्याची दृष्टी त्यांनी स्पष्ट शब्दांत मांडली.
अक्षया नाईक म्हणतात, “शेतकरी कामगार पक्षाचा विश्वास असा आहे की भविष्य तरुणाईच्या हातात आहे, आणि या नेतृत्वाची संधी मला दिली गेली आहे. मी त्याचे सार्थक करण्यासाठी पूर्ण क्षमतेने काम करणार आहे.” त्यांच्या म्हणण्यानुसार, अलिबागसाठी सर्वात महत्त्वाचा मुद्दा म्हणजे आरोग्य व्यवस्था अधिक बळकट करणे. गंभीर रुग्णांना पनवेल–मुंबई येथे तात्काळ उपचारासाठी नेण्यासाठी उपलब्ध होणाऱ्या रुग्णवाहिकांची सुविधा आणखी सक्षम करण्याचा त्यांनी संकल्प व्यक्त केला. “प्रशांत नाईक मित्र मंडळ” नेहमीच नागरिकांसोबत उभे असल्याचेही त्यांनी नमूद केले.
खेळ आणि तरुणाई विकासाबाबत बोलताना अक्षया यांनी सर्वाधिक लक्ष वेधले ते अलिबाग स्पोर्ट्स कॉम्प्लेक्स प्रकल्पाकडे. मागील नगरपरिषदेत सुरू झालेलं हे काम काही कारणास्तव रखडलं, मात्र आता त्याला वेग देऊन अलिबागच्या तरुणांसाठी जागतिक स्तराचे क्रीडामंच उपलब्ध करून देण्याचा त्यांचा मानस आहे. “अलिबागच्या तरुणांना आंतरराष्ट्रीय पातळीवर चमकण्यासाठी प्रोत्साहन देणाऱ्या सर्व सुविधा या कॉम्प्लेक्समध्ये असतील,” असे त्यांनी सांगितले.
पर्यटनात वाढ, समुद्रकिनाऱ्यावरील गर्दी आणि पायथ्याच्या विस्तारामुळे निर्माण झालेल्या स्वच्छतेच्या समस्यांवर त्यांनी स्पष्ट उपाय सुचवला—समुद्रकिनाऱ्यावर ओला–सुका कचरा विघटन प्रकल्प, चेंजिंग रूम, स्तनपान केंद्र, मूलभूत शौचालये आणि पर्यटकांना आवश्यक सर्व सुविधा उपलब्ध करून देण्याची भूमिका त्यांनी मांडली.
शहरातील वाहतूक कोंडी आणि अनियंत्रित पार्किंगवर उपाय सुचवताना अक्षया म्हणाल्या,“विषम–तारखेनुसार पार्किंगची नवी प्रणाली लागू करणार आहे. बंद पडलेले सिग्नल दुरुस्त करून सुरू केले जातील आणि वाहतूक पोलिसांसह समन्वय वाढवून शहरात कोंडी होऊ नये याची खबरदारी घेऊ.”
महिलांच्या सुरक्षेबाबत त्यांनी निर्णायक भूमिका घेत, “अलिबागमध्ये महिला रात्रीही सुरक्षितपणे फिरू शकल्या पाहिजेत. महिला पोलीस कर्मचाऱ्यांची उपस्थिती रात्रीच्या वेळी वाढवण्यासाठी मी प्रयत्न करणार आहे,” असे ठामपणे सांगितले.
शेवटी, अक्षया नाईक अलिबागच्या नागरिकांना आश्वासन देतात—
“स्वर्गीय नमिता नाईक आणि प्रशांत नाईक यांनी बघितलेले अलिबागचे स्वप्न मी पूर्णत्वास नेईन. हा शहरविकासाचा प्रवास सर्वांच्या सहभागानेच यशस्वी होणार आहे.”
अक्षया नाईक यांच्या या व्यापक आणि दूरदृष्टी असलेल्या अजेंड्यामुळे अलिबागमध्ये त्यांच्याविषयी सकारात्मकता आणि विश्वास वाढत असल्याचे राजकीय वर्तुळात जाणवत आहे.
