रायगड बँकेचा नवा टप्पा: व्यवसाय 7000 कोटी पार, ठेवीत लक्षणीय वाढ
रायगड - अमुलकुमार जैन
रायगड जिल्हा मध्यवर्ती सहकारी बँकेने आपला व्यवसाय टप्पा 7000 कोटींपर्यंत पोहचवून राज्यातील सहकारी बँकिंग क्षेत्रातील आपली ओळख अधिक दृढ केली आहे. मार्च 2025 च्या तुलनेत बँकेचा व्यवसाय तब्बल 1300 कोटींनी वाढला असून, यामागे बँकेच्या ठेवीत झालेली लक्षणीय वाढ हे मुख्य कारण आहे. या यशामुळे रायगड जिल्हा बँकेने राज्यातील महत्त्वाच्या सहकारी बँकांमध्ये आपले नाव नोंदवले आहे.
बँकेने आपल्या सहामाही कामगिरीत क्यूआर कोड, IMPS आणि UPI आधारित सेवांवर जोर दिल्यामुळे सेव्हिंग आणि करंट ठेवीत सातत्याने वाढ होत आहे. तसेच रायगडबाहेरील विश्वस्त संस्था, व्यापारी संघटना आणि सहकारी सोसायट्यांनी बँकेच्या मुदत ठेवींमध्ये लक्षणीय गुंतवणूक केली आहे. बँकेचे चेअरमन जयंत पाटील यांनी ग्राहक आणि सभासदांचे आभार मानत सांगितले की, “ही प्रगती संपूर्ण रायगडच्या विश्वासाची कमाई आहे.”
मुख्य कार्यकारी अधिकारी मंदार वर्तक यांनी सांगितले की, बँकेने डिजिटल सेवा विस्तार आणि सायबर सुरक्षा मजबूत केली आहे. यामुळे व्यवहारांची गती, सुरक्षितता आणि ग्राहकांचा अनुभव अधिक सुधारला आहे. ग्रामीण व दुर्गम भागातील लोकांनी डिजिटल पद्धती स्वीकारल्यामुळे ठेवी आणि व्यवहार नैसर्गिकरित्या वाढले आहेत.
बँकेने एनपीए नियंत्रण आणि कर्ज प्रक्रियेत पारदर्शकता यावरही विशेष लक्ष दिले आहे, ज्यामुळे सार्वजनिक विश्वास अधिक दृढ झाला आहे. संचालक मंडळाचा दैनंदिन कारभारातील सहभाग, निर्णयक्षम नेतृत्व आणि सातत्यपूर्ण देखरेख यामुळे बँकेची सक्षम, आधुनिक आणि विश्वासार्ह प्रतिमा निर्माण झाली आहे.
मुख्य कार्यकारी अधिकारी मंदार वर्तक म्हणाले, “बँकेची वाढ फक्त आकड्यांपुरती मर्यादित नाही, तर ग्रामीण ग्राहकांच्या गरजांना प्रतिसाद देणाऱ्या आमच्या सेवा-तत्त्वज्ञानाची ही जमेची बाजू आहे. पुढील काळात तंत्रज्ञान, ग्राहक सेवा आणि वित्तीय शिस्त या तीनही आघाड्यांवर बँक आणखी मजबुतीने काम करणार आहे.”
रायगड जिल्हा मध्यवर्ती सहकारी बँकेचा हा व्यवसाय टप्पा पार करणे राज्यातील सहकारी बँकिंग क्षेत्रासाठी महत्त्वपूर्ण टप्पा असून, बँकेच्या सातत्यपूर्ण विकासामुळे ग्राहकांचा विश्वास अधिक दृढ होण्याची अपेक्षा आहे.
---
